政情：羅致光玩復古 叼玫瑰氹長者

用現時標準去睇粵語長片，黑白畫面同雪花畫質當然難以合格，不過喺五、六十年代，粵語長片就係當時港人嘅主要娛樂，所以尋日中電舉辦長者節活動，就搭咗一個懷舊戲院嘅背景，立刻勾起一班長者嘅集體回憶。而現年六十五歲嘅羅似乎亦被勾起條癮，戴住頂懷舊高帽擺甫士影相時，仲用口叼住支玫瑰，斜晒身兼左手托下巴，全情投入去模仿經典角色。

蔣東強戴眼罩托下巴

至於蔣東強雖則都有托下巴，不過佢淨係戴咗個眼罩，投入程度似乎不及羅喇。蔣就話，依家嘅長者都跟得上時代步伐，鍾意拎住智能手機周圍影相，仲識傳畀朋友添，所以佢都有鼓勵長者喺屋企多用智慧家電，為環保盡一分力喎。