政情：羅致光玩復古 叼玫瑰氹長者
玫瑰除咗用嚟送畀情人表達愛意，仲可以用嚟做乜？勞工及福利局局長羅致光就親身示範，用口叼住擺甫士影相！佢尋日拍住中電總裁蔣東強，同一班長者大玩「復古」，精心打扮拍攝粵語長片劇照。羅搞咁多嘢，都係想喺今日長者日博長者一笑啫。
用現時標準去睇粵語長片，黑白畫面同雪花畫質當然難以合格，不過喺五、六十年代，粵語長片就係當時港人嘅主要娛樂，所以尋日中電舉辦長者節活動，就搭咗一個懷舊戲院嘅背景，立刻勾起一班長者嘅集體回憶。而現年六十五歲嘅羅似乎亦被勾起條癮，戴住頂懷舊高帽擺甫士影相時，仲用口叼住支玫瑰，斜晒身兼左手托下巴，全情投入去模仿經典角色。
蔣東強戴眼罩托下巴
至於蔣東強雖則都有托下巴，不過佢淨係戴咗個眼罩，投入程度似乎不及羅喇。蔣就話，依家嘅長者都跟得上時代步伐，鍾意拎住智能手機周圍影相，仲識傳畀朋友添，所以佢都有鼓勵長者喺屋企多用智慧家電，為環保盡一分力喎。