政情：白鴿黨 新界東支部改選 前綫派系大敗收場
民主黨（白鴿黨）新界東支部近年立立亂，早前先爆出「雙牌頭」風波，近日嘅新界東支部選舉亦被視為黨內派系之爭，結果同該黨新界東立法會議員林卓廷分屬友好、近年由中西區轉戰將軍澳嘅黨員莊榮輝，以大比數擊敗屬於前綫派系嘅白鴿黨大埔區議員區鎮樺，首度當選新界東支部副主席，而前綫派系及區鎮樺陣營嘅候選人就於今次支部選舉中幾乎全軍覆沒。
莊榮輝擊敗區鎮樺
白鴿黨新界東支部前晚舉行會員大會，支部主席由該黨周錦紹獲得近九成七信任票順利當選，至於支部副主席選舉，莊榮輝就以七十一票大比數擊敗得十七票嘅區鎮樺當選。而以區為首嘅四名候選人，於其後支部常委選舉中亦以低票落選，只有被視為區嘅陣營嘅白鴿黨沙田區議員吳錦雄成為唯一「生還者」，成功連任支部常委。
今次支部選舉發生一段小插曲，據稱有候選人不滿一批授權票被裁定無效擬退選，但因選舉冇退選機制而作罷。白鴿黨中委會回應時就話，部分授權書因遲於公司章程指定四十八小時前遞交，故被秘書處判定無效。