政情：法律活動冇影 陳帆尷尬硬頂 鄭若驊懶得交關

翻查律師會官方網頁紀錄，喺二○一三年、一五年至一七年嘅「法律周」活動，時任律政司司長都會出席支持。有法律界人士認為，鄭若驊新官上任，理應要同法律界打好關係，但係鄭大多數只出席同仲裁有關嘅場合，業內其他場合就好少現身，直斥鄭表現懶散。另一法律界人士就話，鄭甫上任即爆出住所僭建醜聞，覺得佢自此怕咗傳媒提問，「近期只得美國國會份報告可能要問到佢（鄭），都唔知佢驚乜？」不滿佢避席公開場合。

有出席活動嘅嘉賓亦寸爆鄭若驊冇影，行政會議成員兼立法會議員張國鈞認為，作為負責法律事務嘅主要官員，理應要出席今次活動。法律界立法會議員郭榮鏗亦話，有關活動以往都係律政司司長出席，「鄭若驊點解唔嚟，真係要問番佢」。

無厘頭頂更 陳帆：友情客串

律師會回覆查詢時話，有邀請過鄭若驊出席「法律周」活動，但係鄭就回覆因有事嚟唔到，而陳帆曾經擔任活動評判，故順理成章擔任活動嘉賓。至於要「頂更」嘅陳帆就形容自己出席係友情客串，又笑言自己好支持推廣法律，尷尷尬尬咁打圓場。一年一度嘅法律界活動，港府理應正正經經派出官員出席，依家騎呢到要「友情客串」，唔知官員出席立法會會議接受議員質詢，又會否當自己係「友情客串」呢？

律政司發言人回應指，司長經常出席法律團體活動，至於個別活動，司長會按其日程而作出安排。

其實鄭若驊被批評懶散已經唔係首次，佢上任首半年喺立法會司法及法律事務委員會嘅出席率僅兩成半，學者及政界人士直斥佢「懶到出汁」及「鴕鳥政策」避見議員。

律政司檢控甩漏 應告唔告

政界人士就質疑鄭唔出席活動應該有好多時間工作，但律政司嘅檢控工作又未見做得好，頻頻甩漏兼爆醜聞，對於違法佔領行動檢控工作拖足四年仍未完成，而對於壹傳媒黎智英涉嫌刑恐東方報業集團男記者一事，有相有片證據確鑿，至今逾十七個月仍未跟進及檢控，被批評「應告唔告」，直斥鄭喺議會內外嘅表現均唔合格，未能彰顯法治，令政府威信受挫。