政情：有相為證：七十年代舊照被讚林健鋒都潮過
上世紀七十年代男士都興留長髮，着喇叭褲，唔少本地男歌手同樂隊都係以呢種裝束示人。商界立法會議員林健鋒（Jeffrey）尋日就喺社交網站上載咗一張陳年舊照，雖然相中人戴住眼鏡，略有書卷味，打扮好明顯係七十年代嘅最潮造型。有人就留言大讚Jeffrey「型仔」，有人就話張相好有紀念價值。
勾起當年內地設廠回憶
Jeffrey喺貼文中提到自己喺七十年代尾到內地投資設廠，唔知呢張相係咪勾起佢當年嘅回憶呢？Jeffrey就話，張相係大約四十年前喺佢鄉下南海影嘅，當時佢喺當地設廠，所以就喺廠房附近影咗呢張相喇。佢仲話，當時嘅廠房通常都喺啲農田同魚塘隔籬，比較簡陋，冇依家嘅廠房咁先進咁話。