政情：象哥研旅客分流救阿鼎亦自救

阿鼎喺東涌南選區嘅選情並非十拿九穩，上次選舉僅僅贏本土派王進洋兩百幾票，依家大橋帶來嘅旅客癱瘓東涌居民生活，阿鼎被批評冇事先同政府講好疏導措施，而王進洋亦乘機大搞東涌光復行動，令到阿鼎成為眾矢之的。東涌旅客滿瀉，但新田邊境購物城就拍晒烏蠅，主力搞購物城嘅象哥喺今年九月成功爭取購物城續租後，一直好想扭轉頹勢，因此度出新橋，救阿鼎又自救。

方案極模糊 計唔出成本

象哥話，大橋令東涌帶來咁大影響，相反購物城就需要人流，佢正叫營辦商研究能否唔收錢，用旅遊巴喺大橋接旅客到購物城，希望做好分流，唔好令人認為香港呢個好客之都趕客，但就要計過條數，睇吓開支幾大才決定到。佢話現時要先同政府了解清楚幾個問題，先至計得到條數，例如到底可以接旅行團定散客，又指即使政府放寬畀旅遊巴喺周五下午五點前申請，以疏導周六、日嘅旅客，但仍然好模糊，未講清楚其他公眾假期點處理，閒日又點安排等，全部都會影響計算成本。

研大橋客赴新田購物城

象哥透露，購物城已有約六成店舖承租，已要求營辦商本月底前有七成承租，以趕及聖誕節檔期，仲度咗幾招吸客，例如近來有盆菜公司主動建議啲團體喺購物城搞盆菜宴，又會聯絡政黨同搞開入境團嘅香港旅行社東主協會會長葉慶寧幫手帶團去購物城，場內亦會加多啲元素，等大人細路都有得玩。對於之前有啲租戶大呻冇生意，象哥就話，現時研究參考商場經營模式引入新租金制度，收取較低嘅固定租金後，再以商戶營業額分成，但係未有定案。

講真嗰句，東涌就喺香港西南面，購物城喺香港最北面，車程最少要四十分鐘，加上缺乏大佛同主題樂園等景點，到底係咪有遊客肯去，可唔可以救到阿鼎同象哥，真係冇人知，不過如果象哥呢招有用，令東涌居民同購物城租戶冇咁慘，對大家都係好事嚟嘅。