政情：今日你上鏡：吳文華戴四方帽 孫仔女送毛公仔

正所謂活到老、學到老，就算退咗休，仍然可以活得精彩。立法會前秘書長吳文華(Pauline)喺退休後開始追求夢想，今年六十七歲嘅佢仲取得人生中第一個學士學位。Pauline係當年立法會秘書處內少數冇大學學位嘅職員，四年前佢就報讀咗澳洲一間大學嘅組織管理(Organizational leadership)遙距課程，努力咗咁耐，終於畢業。佢早前專程遠赴澳洲出席尋日舉行嘅畢業禮，見佢着住畢業袍，戴上四方帽，真係神采飛揚。佢手上仲抱住熊啤啤公仔，同依家興抱住毛公仔影畢業相嘅大學生差唔多。佢話毛公仔係孫仔女送畀佢嘅，唔怪得笑容甜到漏啦。