中環出更：馬逢國姚思榮唱雙簧 倡設文化及旅遊局
施政報告提到會研究分拆運輸及房屋局，但對設立文化局就隻字不提。不過，體育、演藝、文化及出版界議員馬逢國食咗個大檸檬仍然唔放棄，提出成立文化、體育及旅遊局；而旅遊界議員姚思榮就支持成立文化及旅遊局，認為體育應該留番畀民政事務局管理會好啲。
馬逢國：政府講到咁倔好失望
對於政府講明今屆任期內不會考慮設立文化局，馬逢國坦言政府講到咁「倔」好失望，批評現時文化政策散亂，例如博物館係民政事務局負責，文化商業活動就歸商務及經濟發展局，藝術教育就由教育局管理，佢認為文化應該由一個專門政策局去統籌。
馬逢國又話，單獨設立文化局會有好大阻力，所以早就建議設立文化、體育及旅遊局，認為三者關係密切，加埋一齊爭取力度會大啲。
姚思榮亦認同文化同旅遊關係密切，舉例政府投放好多資源去保育歷史文物，但又唔向市民或遊客宣傳，未能發揮經濟效益，如果一條龍處理就好好多喇，不過佢就指體育好似格格不入，都係留番喺民政事務局比較好，即係支持設立文化及旅遊局。姚同馬兩個同聲同氣，一唱一和，唔知能否說服到政府改變立場呢？
卓妮