中環出更：BB用二手物品有福氣 容海恩暗示想連任
立法會開會不時出現火花四濺嘅情況，不過尋日嘅會議室就一片祥和，皆因尋日係一年一度嘅兒童議會會議，一班兒童議員喺立法會嘅會議室辯論與兒童相關嘅議案。快將成為人母嘅立法會議員容海恩（Eunice）都有出席，唔通係想偷定師，了解現今兒童嘅想法？
今年嘅兒童議會會議有五十一名十二至十六歲嘅兒童參加，佢哋尋日就喺立法會合共提出同辯論三項有關兒童嘅議案。在場嘅Eunice大讚呢班兒童做嘅研究夠全面，大部分議員所關注嘅問題佢哋都覆蓋到，雖然所提出嘅建議未必實際操作得到，但有呢個心已經好難得咁話。明年二月就做媽媽嘅佢透露啲嬰兒產品全部唔使買，會用二手物品，一來因為啲用品BB好快就唔啱用，二來用二手物品代表有福氣喎。咁會唔會留低啲物品等將來生多個時用呢？佢就反問係咪要趕喺二○二○年立法會換屆選舉報名期前生，似乎係話畀大家聽，佢唔會放棄連任喇。
郭偉強教囝囝聽到自己名舉手
已為人父嘅立法會議員郭偉強都在場。佢話呢班兒童議員嘅建議好多都由第一身出發，有助佢了解兒童嘅諗法，亦提醒咗佢要開始多啲同兩歲半嘅囝囝傾偈，培養囝囝一有問題就同佢講嘅習慣。佢又話，囝囝開始去幼稚園面試，已經報咗四至五間屋企附近嘅幼稚園。至於有咩面試心得，佢就話只係教囝囝聽到有人嗌自己名就舉手，千祈唔好冇反應喎。
教育界立法會議員葉建源同資訊科技界立法會議員莫乃光（Charles）對住班兒童議員時立即放低議員身份，強調自己只係市民，仲話做市民比議員舒服添。不過Charles就覺得今次議案限制咗兒童議員發揮，否則就有更多針鋒相對嘅場面，會更好玩。聽落佢好似覺得真實嘅立法會有趣味啲噃。
卓妮