中環出更：鄉議局推壁畫文化 劉玉蓮任子女畫牆
唔少小朋友都鍾意喺牆壁上作畫塗鴉，令到悉心布置屋企嘅家長都好頭痛。鄉議局尋日舉行鄉郊彩繪計劃嘅啟動禮，已故鄉議局主席劉皇發嘅女兒劉玉蓮育有三名子女，佢尋日都話要面對呢個問題，不過佢唔止冇阻止仔女喺牆上畫畫，仲特登預留咗兩面牆畀仔女畫添。
本身係設計師嘅劉玉蓮，藝術細胞都有番咁上下。佢就話，作為家長都好難避免到仔女喺牆畫畫，而且佢都希望仔女做番一般小朋友會做嘅事，所以就冇阻止佢哋，仲預留兩面牆專畀佢哋畫畫用，不過就要用可以抹得甩嘅筆嚟畫。睇嚟其他家長都可以參考吓呢個做法喇 。
鄉議局執委簡汝謙細個時都有畫花屋企牆壁，之後見到屋企要更換牆紙，就知衰唔敢再畫喇，好彩屋企人就冇乜點斥責佢咁話。佢認為，畫牆同街頭塗鴉文化類似，如果可以有系統同制度咁畀年輕人喺街頭塗鴉都係一件好事，可以作為畀佢哋展示藝術細胞嘅平台喎。
林景昇試過畫天花板
同場嘅傑出青年協會前主席林景昇似乎係畫花牆壁嘅高手，因為佢向高難度挑戰畫天花板！不過佢就話已經唔記得當時過程，估計係爬櫃上去，仲話諗番都覺得危險。雖然佢事後都畀媽媽話咗幾句，但亦都成為佢屋企茶餘飯後嘅話題，不時重提起都會齊齊笑。
當日唔止係鄉議局鄉郊彩繪計劃啟動禮，亦都係鄉議局大樓外一幅壁畫嘅收筆禮，鄉議局主席劉業強當然有現身主持大局。佢就話，呢個計劃會延展到廿七鄉，希望大家都開始着重文化推廣，如果鄉事委員會冇位置畫壁畫，都可以改去村公所，好似外國啲壁畫村咁。問起佢細個有冇畫公仔上牆，佢就話自己鍾意音樂藝術，但就冇試過，都係做運動多，反而家姐同細佬嘅畫畫天分就幾好咁話。
卓妮