中環出更：嫌手續繁複 許章榮：支援廠商最緊要快
雖然內地疫情逐漸放緩，部分城市都已開始解封，但重開生產線仍要面對好多問題。床上用品生產商許章榮都有喺內地設廠，佢話唔少工人仲未返到廠開工，而唔少供應床上用品布料嘅廠商都改為生產口罩，好難搵到原材料，搞到佢頭都痕埋。
講起政府嗰一千三百幾億防疫抗疫基金終於通過咗，許章榮認為點都好過無嘅，但都係「吊鹽水」o架咋！佢又指申請資助嘅手續繁複，而資助最緊要快！佢覺得應該要簡化申請手續，即使可能會出現瞞騙行為，或者有少少錯漏，但可以之後再跟進。佢又指瞞騙嘅個案可能得百分之二，但真正需要幫助嘅商家就佔百分之九十八，寧願出錯都好過幫唔到大部分嘅人。佢話好好彩自己公司未需要裁員，但有啲員工自然流失咁囉！
香港中華廠商聯合會副會長史立德從事紙品生產，因新冠肺炎喺全球爆發，佢話有唔少外國客戶取消或延後訂單，都幾煩o架！佢以前一直習慣去會所健身同埋打乒乓波，但依家會所同健身室都關閉，佢每日放咗工都留喺屋企，日日都喺度睇片同食嘢，搞到肥咗好多添呀！佢希望疫情去到五月中左右可以完啦，好多企業都頂唔住喇！
楊志雄禁聚令下頻作客
廠商會常務會董、有「耳筒大王」之稱嘅楊志雄，話成班廠佬以前好鍾意一齊食飯應酬，但疫情開始後再加埋政府實施「禁聚令」，佢都好難同朋友出街食飯。不過，佢話朋友點都要見嘅，所以就變咗輪流去唔同朋友嘅屋企作客，大家見面都係傾吓偈、吐吓苦水啦，佢仲話有啲朋友識咗好多年，都無試過短期內上咁多次屋企。
卓妮