中環出更：臨時反口 張建宗拒露面接請願信
新一份施政報告發表在即，香港融樂會、天主教勞工牧民中心等多個關注少數族裔嘅團體尋日就去政府總部請願，仲話原本約好咗政務司司長張建宗出嚟接收請願信，點知張喺佢哋請願前一日先反口，急急通知話唔會出嚟接信，淨係肯喺辦公室見面十分鐘，但冇解釋原因，佢哋都有啲失望喎。
僅安排會議室會面
政務司司長辦公室回覆話，應邀與四十五位少數族裔人士見面，並按一貫安排同佢哋喺會議室會面，聽取意見及接收意見書，但就冇講係咪反口唔出嚟接信影相嘞。
至於團體訴求，佢哋認為少數族裔督導委員會成立以來，未有明確工作方向及撥款分配方案等。融樂會總幹事張鳳美會面後引述張建宗話，最重要助少數族裔童學中文，就業方面幫佢哋向上流等，亦會了解有指部分幼稚園不錄取少數族裔，若有此情況會作檢討，承諾今次施政報告會涉及少數族裔嘅措施。
卓妮