中環出更：家族新生代學嘢基地 廖偉芬咖啡店變少林寺
銀行家族後人、保良局總理廖偉芬（Jennifer）自創嘅咖啡王國愈做愈穩定，早前仲為城中十幾位魅力男士推出度身訂造私人咖啡豆品牌，一齊做善事。卓妮喺發布會現場見到有位靚女一早就嚟到幫手，原來佢係Jennifer嘅姪女Iva，傾開先知Jennifer嘅咖啡店已成為家族新生代投身社會之前學嘢嘅基地，佢仲笑言話係「少林寺」也不為過。
Jennifer話，Iva係六伯父嘅孫女，再之前大伯父嘅孫女都喺佢度做過一輪。佢哋當然唔係嚟學沖咖啡啦，而係想親身體驗一下點樣貼地做嘢。佢又話，年輕人想學嘢都係好事喎。
羅揚傑飲咖啡唔會失眠
講番個活動，今次活動揀咗十幾位獲得港安醫院慈善基金（基金）頒予獎項嘅魅力男士，幫佢哋揀選度身訂造啱晒自己嘅口味，兼且貼上自己嘜頭嘅咖啡品牌，當中一半銷售收入會捐畀基金。
名人周國豐（Brandon）、海濱事務委員會成員羅揚傑（Alan）都係獲邀共襄善舉嘅男士。Brandon話佢日日都要飲咖啡，唔飲就好似個人未醒一樣。而Alan都係咖啡迷，一日飲七、八杯都唔會瞓唔着，不過佢都承認咁樣唔夠健康。
基金主席蘇瑋愉都有到場，佢笑笑口話基金係幫助患有心臟病嘅兒童，至於兒童點樣防止患上心臟病，佢就教路要多啲運動、少肉多菜同埋早啲瞓。佢話都明白係好難做到，但都要盡量推廣正確生活態度喎。至於佢自己嘅健康貼士，就係一星期會食素幾日，令身體感覺舒服啲喇。
卓妮