中環出更：陳健波梁繼昌出埠一個月 功能界別輕鬆啲？
立法會開會好困身，議員想旅行去玩都有啲難度，所以每逢暑假都會「逃離」香港充電。其中保險界議員陳健波（波哥）同會計界議員梁繼昌就分別離開香港約一個月，成個月唔做嘢，睇嚟功能界別議員錢多之外，仲比要落區嘅地方直選議員輕鬆好多喎。
根據立法會資料，暫時離港嘅議員就有梁繼昌、波哥、飲食界議員張宇人等。梁繼昌就由上月廿七日已經離港，到下個月三日先至返港，離港超過一個月。波哥亦由上月廿二日離港，到今個月二十日先返，都有接近一個月時間。張宇人同工程界議員盧偉國都分別離港廿一日同十七日，認真梳乎。
EQ以色列外訪考察
波哥近日都有喺社交網站上載「波哥旅行團」嘅相及短片，佢先去咗英國曼徹斯特，然後去蘇格蘭，仲拍埋片教網友點樣去電影場景「打卡」同影靚相添。不過，直選議員葛珮帆（EQ）、陳志全、葉劉淑儀同鄭泳舜都有離港。其中EQ離港都超個三個星期，去咗以色列外訪考察，唔知佢喺外訪行程完結後會唔會留低玩多幾日呢？
卓妮