政情：葉劉疑為容海恩出頭爭取立會添育嬰室
新民黨立法會議員容海恩（Eunice）被傳與該黨政策總裁袁彌昌奉子成婚，兩人早前已拉埋天窗。Eunice未婚懷孕嘅傳聞引起社會關注立法會議員究竟有冇產假、懷孕期間議員薪酬等問題。身兼該黨主席嘅立法會議員葉劉淑儀（葉劉）就計劃去信立法會行政管理委員會，就議員懷孕提出多項建議，佢仲話部分區議會早有相關安排，該黨區議員陳家珮（Judy）所屬嘅南區區議會就係其中之一。已懷第二胎嘅Judy亦揚言要繼續為媽媽們爭取權益，「新民黨變BB黨」咁話。
稱男議員都應支持
葉劉尋日話雖然唔知Eunice係咪如聞中所講已懷孕，但立法會喺有關議員懷孕方面嘅措施確有改善需要。佢以立法會綜合大樓育嬰室為例，現時只有地下大堂有育嬰室畀到訪立法會嘅公眾人士使用，議員辦公室樓層並冇育嬰室或哺乳室設施，批評大樓當年設計並冇為家庭友善着想。佢又留意到有網民認為議員因懷孕唔能夠開會、投票，就應該「炒咗佢」，甚至話「抵死」，佢認為呢啲言論已構成歧視，立法會應反對歧視。
不過，佢都慨嘆勞工法例對議員嚟講並唔適用，所以都冇所謂產假同薪金方面嘅安排，但議員因懷孕生育而唔能夠出席會議唔應該當做缺席，所以立法會十月復會，佢就會採取行動。問到會唔會游說其他女議員聯署行動，佢就話會考慮，仲話呢樣嘢唔止女議員支持，男議員都應支持咁話。身兼行管會主席嘅立法會主席梁君彥睇嚟都要接招喇！
本報翻查十八個區議會會議常規，發現南區、深水埗、九龍城、黃大仙、大埔、西貢、離島都分別喺二○一五至一七年作出修訂，議員可因懷孕、分娩相關理由喺區議會會議前提出申請，就唔當缺席。其中南區區議會列明申請適用於懷孕引起嘅不適同預產期前後十周期間內舉行嘅會議， 而如果配偶生育，議員亦可享有五日侍產假。
Judy直言南區安排源自佢前年懷孕，當時區議會接納咗佢嘅缺席申請。不過作為母乳媽媽、曾自爆要喺當區區議會主席朱慶虹辦公室泵奶嘅Judy就揚言，要繼續爭取全港區議會爭取育嬰室，又話該黨嘅女士都關注媽媽權益，新民黨要變BB黨咁話。有葉劉同Judy為媽媽們力爭權益，相信Eunice生B都冇有怕喇！