政情:政府鬧人才荒翻兜張雲正入熱廚房

現屆政府上場滿一年,代表上屆政府啲高官已經離開熱廚房夠一年,過完冷河可以轉新工。不過,至今已有唔少前高官被翻兜獲政府委任公職,最新輪到前公務員事務局局長張雲正,到底政府睇中佢哋嘅名氣,定係鬧人才荒而被迫重召多位舊將攝位呢?

擔任保監局行政總監

張雲正加入政府超過三十年,在上屆政府中途出任局長一職,雖然未有過渡至現屆政府,但喺現屆政府組班期間,一度有傳佢會「升呢」做政務司司長,但據悉佢為咗照顧年老母親先選擇離開熱廚房。不過,政府尋日就委任佢做保險業監管局(保監局)行政總監,任期由下月十五日起至二○二○年八月十四日,為期兩年。

張雲正離開政府前係掌管公務員事務,亦曾任海關關長,但佢曾經喺○六年至○九年期間出任保險業監理專員,早有同保險業界合作嘅經驗,所以其履歷都總算同今次任命有關連,而且其任命係經過以保監局主席為首嘅遴選委員會選拔,都算有說服力。

張雲正被「循環再用」,曾任香港教育學院(現為香港教育大學)校長嘅前運輸及房屋局局長張炳良,更早喺去年十月就獲委任為檢討自資專上教育專責小組主席。專責小組上月公布諮詢文件時,張就保持住高曝光率,好似出席電台節目及立法會教育事務委員會等,唔講以為佢仲做緊局長。

至於前民政事務局副局長許曉暉,因為文化局開局不成而坐正無望,未有留任至現屆政府,但佢就喺今年三月起出任香港故宮文化博物館有限公司董事,與其任內主理嘅事務息息相關。不過,故宮文化博物館忽然空降於西九文化區內,而且許嘅任命係由法定組織西九文化區管理局宣布,都算係半隻腳踩番入熱廚房。

陳家強當競委會成員

而前財經事務及庫務局局長陳家強亦都係今年四月獲委任為競爭事務委員會成員,但佢曾任消費者委員會主席,性質亦都同競委會接近,都算係有經驗嘅人選。無可否認呢班前高官嘅履歷同政府委任嘅公職相關,但政府接二連三翻兜離開熱廚房不久嘅前高官,新面孔反而欠奉,難免令人感覺政府人才凋零,要翻兜前高官攝位先至搞得掂。

第一手消息請下載on.cc東網iPhone/iPad/Android/Windows Phone Apps