政情：梁君彥否認吹黑哨呻被當沙包

稱專業團隊限制 如繩勒頸

梁君彥自出任主席以來都飽受爭議，不但捲入國籍風波，其主持會議手法包括限時發言、趕議員離場等都經常激起民主派不滿，所以呢個星期嘅大會就辯論由議員李國麟提出對佢嘅不信任動議，佢要避席，而許智峯等民主派議員會上鬧爆佢。梁話當時喺房間細心聆聽，強調會尊重每位議員意見，會提醒自己做好啲，「有不足咪改囉」。

梁仲講到，立法會由不同政黨組成，但大家都係為香港做事，希望將來會多啲合作、多啲了解，咁先係市民樂見，仲話身為主席被當作沙包同出氣袋都冇問題，最重要都係大家做好議會同為港人做事喎。

之後佢更話理解民主派不滿其決定，更自爆建制派都有好多不滿，但佢要忠於主席身份，唔會偏幫建制派，強調要揸住《基本法》同《議事規則》做事，因為每個決定都有機會受到司法挑戰，所以一定要中立，希望大家明白佢唔會亂作決定，因為佢背後有成班專業團隊，形容有好多條繩勒住佢條頸，限制佢做事，所以絕對唔會夾硬嚟。

至於吹黑哨嘅批評，梁指最重要嘅係終審法院判詞已列明立法會主席嘅權力，指民主派唔睇判詞佢都無符，仲話如果真係吹黑哨已經收到司法覆核啦，使乜等喎。至於被要求辭去上市公司受薪非執行董事，佢就話非執董只係幫小股東監察公司，亦會受證監會監管，直言樣樣都好透明。

另外，本年度議員一共提出二百二十二次點算開會法定人數要求，耗時超過三十九小時，有兩次因法定人數不足休會而損失十五小時。不過，今年就通過咗二十七項法案，較上個會期多超過一倍。

雖然梁君彥講到做主席行事處處受到掣肘兼畀人勒住，又大呻民主派同建制都對佢有所不滿，不過日前佢就喺建制派護航下，否決咗民主派對佢嘅不信任動議，睇嚟佢只係扮慘博同情啫！