中環出更：睫毛長整損眼球 梁志祥嚇餐飽
「小酒窩長睫毛迷人的無可救藥」，正所謂歌都有得唱，有長睫毛十分迷人，不過有時都會整傷眼！立法會議員梁志祥（祥哥）尋日出席一個活動時，話要向政府施壓推行普及驗眼，佢仲親身上陣畀專業視光師驗眼，點知一驗就發現佢眼睫毛過長，整損咗眼球！嚇到祥哥即刻問係咪要拔毛防損，聽見都覺得痛啊！
滴番眼藥水就得 唔使拔毛
驗眼分為三部分，首先遠距離單眼讀數字，睇吓視力如何，祥哥一坐低氣勢如虹咁讀晒出嚟。第二部分要驗有冇眼乾，視光師話祥哥有少少眼乾，而且左眼下眼睫毛過長刮損咗眼球，不過滴番眼藥水就得，唔使拔毛。最後驗眼壓就幾正常。祥哥聽到之後都話，好彩只係少少事，無咁擔心喎。
其實尋日活動係宣傳民建聯喺暑假將展開一個社區健康計劃，喺十八區推動驗眼、驗耳同骨質檢測。立法會議員陳恒鑌就擔任護眼大使，尋日仲同祥哥一齊體驗青光眼同黃斑病變，戴上模擬有眼疾嘅眼鏡大玩拋波，最後祥哥勝出，兩人玩完都大叫「真係好難睇嘢啊」。
卓妮