政情：立會七國咁亂 好得人驚「秘書長唔易做」

Pauline原本講起秘書處嘅傳承好重要，應該要珍惜經驗較深嘅同事。被問到係咪不應再公開招聘秘書長一職，Pauline就話自己退休時，有公開招聘秘書長，秘書處內部人士都可以申請，當時由行管會轄下嘅遴選委員會決定揀邊個。但係傳媒不時報道立法會嘅激烈場面，令到好少人肯做秘書長，因為呢啲人原本喺外面機構擔任較高職位，會擔心係咪日日都要面對呢啲激烈場面，因而卻步。如果係立法會秘書處出身，就會明白呢啲場面只係工作環境嘅一部分，平時環境都好好，份工亦好有意思。照咁講，現任秘書長陳維安咪好難交棒？

應對「搞嘢」議員 罰則須夠阻嚇力

立法會議事規則委員會正研究修改議事規則，若議員多次被逐離場，或有機會整個年度都被禁止出席會議。Pauline認為，若有議員經常阻礙議會順暢履行職能，應該要有應對措施，罰則要有阻嚇作用，令議員明白刻意「搞嘢」會有後果。但參考外國議會做法時，亦要考慮香港獨特環境，例如香港每周只有一次大會，有啲國家嘅議會就係每日開會，若唔准開會三次，只影響三日，若應用於香港即有三星期唔可以開會，所以要慎重行事。Pauline又話，外國議會的確有規定，若議員嚴重影響會議，或需要整個會期被禁止開會，但必須獲多數議員同意。

卿姐就質疑認為，凍結議員出席一、兩個月嘅會議都係大事，即使期間有關議員仍獲出糧，但議員由選民選出，點可以無端端被禁開會幾個月？

講開秘書處，近日部分二○○○年六月前入職嘅立法會秘書處員工，要求與此日期後入職嘅員工一樣可延長退休至六十五歲，Pauline話，行管會曾通過喺不阻礙其他員工晉升下，屆滿六十歲嘅員工可選擇延至六十二歲才退休，依家最少可以沿用呢個做法嘅。