中環出更：赴法影婚照 撞正捧世盃 林琳難忘喜雙逢
世界盃冠軍之爭日前落幕，好多人都全情投入呢場戰役。咁啱到法國影婚紗相嘅荃灣區議員林琳最驚喜，佢喺Facebook擺上一張相，着住婚紗嘅佢同未婚夫喺一間餐廳內，眾人狂歡好似恭喜佢哋，其實係慶祝贏波。佢話事前冇預到可以喺法國睇埋決賽直播，法國仲攞埋冠軍添！難怪佢話要多謝大家咁自然又配合得天衣無縫，令佢畢生難忘。
保良局總理鄧宣宏雁（Emily）同老公鄧鉅明就喺九龍一間酒店舉行睇波派對，廣邀城中好友一齊開心吓。有三百幾名好友出席，連保良局足球隊都去趁熱鬧，大家一邊食嘢一邊睇波，氣氛好高漲。講起波經，Emily笑稱唔識睇，今次都係人生第二次睇世界盃決賽，由於自己好鍾意法國，所以感情上都支持法國贏波嘅。
劉守良囡囡奪IB女狀元
珠寶設計師劉黃寧達（Leta）同老公劉守良、女兒Katarina都有去玩，Katarina仲抱起大力神盃，笑容燦爛，似足自己攞咗冠軍。其實小妮子又真係啱啱攞咗個第一名，佢喺啱啱放榜嘅IB（國際文憑）試中取得滿分四十五分，成為女狀元，認真厲害。Leta笑稱自己唔係虎媽，個女自細讀書成績都唔錯，只係未至於次次攞滿分，所以今次都有啲驚喜。過兩日佢哋會返吉隆坡婆家，到時會同嫲嫲等屋企人好好慶祝一番。
香港各界商會聯席會議秘書長沈運龍都請埋一大班朋友到屋企睇波，佢笑稱唔敢唔撐法國隊，事關太太Alice係法國籍。最終法國勝出，梗要開埋香檳狂賀喇！
卓妮