政情：今日你上鏡：蘇錦樑曬到變朱古力色

商務及經濟發展局前局長蘇錦樑（Greg蘇）已經冇做官成年，回歸律師老本行之餘，閒時享受生活。近日佢就專程遠赴加拿大慶祝外父九十歲大壽，餐餐都係食住家飯，其中有一餐就係龍蝦配牛扒。Greg蘇仲上載自己捧住碟原隻龍蝦嘅相片，隻龍蝦色水靚，睇落夠晒新鮮，不過佢嘅膚色就唔多靚喇，事關日日去釣魚，曬到成個人好黑，佢就形容自己膚色似朱古力。有朋友仲驚佢曬親，特別提醒佢要做好防曬保護。