政情：鄭泳舜好跑得 黨友笑指似「阿甘」
立法會議員鄭泳舜（Vincent）一向熱愛跑步，不時都會參加香港同外地舉行嘅馬拉松比賽。尋日佢嘅深水埗地區辦事處開幕，同樣鍾意跑步嘅政制及內地事務局局長聶德權都有到場。Vincent話，佢哋兩個都係「跑得之人」，仲話要約埋跑鋪勁嘅。點知佢一講完就被黨友笑佢似電影《阿甘正傳》嘅主角「阿甘」。
《阿甘正傳》係同跑步有關嘅經典電影，出席開幕禮嘅議員李慧琼話，Vincent似電影中嘅阿甘，一開頭好孤單咁跑，但因有感染力感染到其他人，就愈來愈多人一齊跑喇。Vincent被指似阿甘，都唔知好嬲定好笑。
同蔣麗芸互抹汗
同場嘅仲有Vincent黨友蔣麗芸（Ann），Vincent話同Ann喺議會係同一陣線，睇嚟佢哋關係都好團結。點解咁講？因為尋日天氣熱，Vincent就向Ann遞上雪凍嘅毛巾，Ann就即刻用毛巾幫佢抹汗，佢又幫番Ann抹。估唔到未到換屆選舉，大家都可以搞到一額汗，莫非驚攞唔番兩席？