政情：立會襟章與日本國會撞款 譚文豪倡重新設計
立法會紀念品中有一款議員先可以購買嘅立法會襟章，議員譚文豪（Jeremy）開會同出席官方場合都會佩戴。立法會秘書處就紀念品事宜向議員收集意見，Jeremy就反映希望重新設計襟章，究竟佢對個襟章有咩不滿？佢話係因為個襟章同日本國會議員專用嘅襟章太似樣，搞到香港議員個襟章好似「A貨」咁。
都係金色圓形造型
Jeremy話去旅行時鍾意參觀當地議會，所以見過日本國會議員嘅襟章，當佢做咗議員，見到立法會襟章時都好愕然。佢仲即場展示日本國會議員襟章嘅圖片，果然兩款襟章幾乎一樣，都係圓形設計，而日本襟章中間係金色十一瓣菊，香港襟章就係圓形金色中有一個「立」字。
佢話議員襟章代表議員身份，希望可以有識別性，唔好同其他襟章太相似，加上歷史背景因素，都有啲尷尬。佢之前曾經戴住立法會襟章應邀出席南京大屠殺紀念活動，唔知係咪咁，令佢特別有感受呢？