政情:何君堯六委會出席率少過五成

立法會休會放暑假在即,意味今個立法會年度完結,議員考勤其中一個重要指標就係出席率,除咗大會及財務委員會外,議員於事務委員會嘅出席率亦值得關注。據立法會統計紀錄,報稱獨立嘅新界西議員何君堯,有多達六個委員會出席率低於五成,其中交通事務委員會只錄得兩成半出席率。至於同為新界西議員嘅實政圓桌田北辰,亦有兩個委員會出席率係五成或以下。議員加入咗委員會又唔開會,究竟去咗邊呢?

截至尋日為止,本報統計全體議員於十八個事務委員會嘅出席率,雖然律師何君堯參加咗多達十三個委員會,包括出席率百分百嘅環境事務委員會,但同時佢有近一半嘅六個事務委員會出席率低於五成,出席率最差係交通事務委員會,只有兩成半;財經、資訊科技及廣播事務委員會嘅出席率有四成二,發展、衞生事務委員會則分別有四成六及四成七出席率,另外福利事務委員會嘅出席率則有四成八。

解釋擺街站撞開會時間

至於個別委員會出席率一般嘅議員仲有田北辰,佢合共參加十個事務委員會,其中人力事務,以及資訊科技及廣播事務委員會嘅出席率分別只有五成及四成二。另外民主黨鄺俊宇、鄉議局劉業強、地產及建造界石禮謙等人,各有一個委員會嘅出席率錄得五成或以下。

對於六個委員會嘅出席率低於五成,何君堯解釋,唔可以單靠出席率去判斷議員嘅表現,要睇埋議會發言同工作質素等因素,又形容自己喺議會出親聲都好有分量。何又話自己定期發表工作報告同網上直播,每逢周一、二朝早都擺街站,好多時都撞咗開會時間,但遇上會議有重要議題都會作出調整,佢重申過去兩年嘅議員生涯都好負責任履行職務。本報曾致電田北辰,希望對方回應兩個委員會出席率只有五成或以下嘅原因,但直至截稿前未獲回覆。

財會出席率吳永嘉最低

翻查資料截至本月七日為止,財務委員會出席率最低嘅議員係工業界吳永嘉,只有六成三,變成財委會大懶蟲。事有湊巧,吳同何、田二人都係獨立建制派議員。經常批評民主派拉布嘅建制派,成日話自己係做實事嘅,唔通做實事就特別忙啲嘅?

第一手消息請下載on.cc東網iPhone/iPad/Android/Windows Phone Apps