政情：試食止夜尿核桃 吳得掂工展快閃

吳得掂參觀咗唔少攤檔，多數駐足喺出售天然食品嘅攤檔，其中出售核桃產品嘅攤檔吸引力可謂最大，事關佢逗留時間最長，不但留步試食更聽埋介紹。售貨員亦用上圖片細心講解，更表示將部分核桃沖水飲用會有止夜尿作用，吳得掂聽後二話不說就與同行嘅政治助理施俊輝，分甘同味手上嘅核桃。

逛半個鐘零消費

佢試食後稱味道「好自然」，但佢透露只會間中進食果仁，或者因此而冇購買。佢最後逛咗半個鐘就結束行程，雖然佢起初曾表示會購物消費，但最終都只係兩手空空咁離開工展會。

不過民望長期包尾、飽受批評嘅吳得掂，整個過程只有施俊輝陪同，連主辦方廠商會嘅代表都冇同行，與萬名市民同場嘅佢，難道唔怕遇上突如其來嘅示威？