中環出更：高永文自爆係葡粉
四年一度嘅世界盃一到來，勢掀起熱潮，唔單止餐廳食住個勢做生意，連化妝同美容業都湊熱鬧。香港化妝品同業協會（協會）日前搞咗個活動，仲向出席活動嘅嘉賓、食物及衞生局前局長高永文送贈以葡萄牙球星C朗做封面包裝嘅香水。高永文收到之後勁開心，仲自爆係「葡粉」、即葡萄牙隊嘅球迷。
世界盃多達六十幾場賽事，要睇晒都唔係易事。高永文就話佢同其他球迷唔同，睇波睇得好感性，事關佢唔會睇晒世界盃咁多場賽事，只會睇自己鍾意嘅球隊參賽嘅賽事，而佢鍾意嘅就有葡萄牙、西班牙同埋意大利。咁似乎佢捱眼瞓睇波嘅日子唔會好多啫！
協會副會長洪玉芝同協會理事歐陽鳳盈都在場，仲見到香港餐飲聯業協會副主席黃浩鈞同該會會員李祉鍵添！點解餐飲業代表會出席化妝美容業嘅活動嘅？黃浩鈞話佢爸爸、餐飲聯業協會會長黃家和喺法國有個酒莊，於是之前餐飲業界同協會就齊齊去咗法國，搞咗個「美女廚房」活動，至於美女就梗係來自協會啦！黃浩鈞仲話有個講法話飲紅酒可以美容，所以餐飲業同化妝美容行業都不無關係喎。
黃浩鈞囡囡世界盃捧西班牙
講起足球，咪以為係男生嘅專利。黃浩鈞話佢六歲嘅囡囡都有睇波，因為囡囡平時有踢波，所以對世界盃都好有興趣。咁佢囡囡支持邊隊呢？佢就話囡囡係捧西班牙。至於點解，佢就估可能因為西班牙多靚仔喎。而李祉鍵就話喺英國讀書時就成日睇波，但佢就唔係捧英格蘭，反而一向睇好比利時咁話。
卓妮