中環出更：葵芳拆「山墳」陳恒鑌寸爆四大學會

政府早前喺葵芳興芳路與興寧路交界用地磚堆砌咗一個名為「安全島」嘅大型藝術品，係發展局舊年舉辦嘅「城市藝裳公共藝術比賽」作品之一，不過整完之後就冇乜人識欣賞，畀一眾網民嘲笑似「山墳」，最後喺該區區議員同街坊多番夾擊下，政府尋日終於動工拆走安裝費用涉八十五萬元嘅山墳藝術品喇！

鑑於「城市藝裳公共藝術比賽」係由發展局聯同建築師學會、園境師學會、規劃師學會同城市設計學會，即四大專業學會一齊舉辦，立法會議員陳恒鑌就話專業學會嘅概念可以參考，但係咪落地同符合居民利益又係另一回事，希望學會以開明態度去接受，有時專業人士覺得靚，居民都未必會認同。

陳恒鑌仲借機暗嘲一直關心元朗十七億元天價行人天橋嘅立法會議員朱凱廸，話朱凱廸支持嘅替代方案都係四大專業學會搞出嚟，而葵芳山墳藝術品都係四大專業學會有份，依家藝術品要拆喇，如果落成替代方案嘅天橋，唔知下場又會係點呢？

卓妮