政情：巴西睇肉團難產 陳恒鑌張宇人變箭靶
立法會食物安全及環境衞生事務委員會早排籌備喺今年八月搞個巴西「睇肉團」，了解當地肉類處理同進出檢疫情況，惟提出完之後得七人報名，加上各議員陸續縮沙，早已亮起紅燈，直到尋日終於因為外訪人數不足三人而取消，正式變成「甩底團」。由於呢個「睇肉團」係由民建聯嘅陳恒鑌同自由黨飲食界議員張宇人聯署要求嘅，但佢哋亦都先後甩底，依家睇肉團告吹，佢哋再度成為箭靶，被其他議員鬧爆。
譚文豪何君堯先後退出
陳恒鑌早前已經話因為夾唔到期所以冇報名，至於張宇人本來都話去，點知早前以年事已高，打防疫針有風險，所以唔參加睇肉團嘞！本來都冇乜大影響，事關本月初嘅時候都仲有委員會主席何俊賢（高佬賢）、委員黃碧雲（一舊雲）同譚文豪、非委員何君堯參加，勉強可以成團，但最新消息係譚文豪同何君堯都先後退出，「睇肉團」終告難產。
一舊雲買晒機票打埋針
相信最失望嗰個應該係高佬賢，因為佢由始至終都想搞得成嘅，而一直堅持話會外訪巴西嘅一舊雲知道「睇肉團」告吹後，直言非常憤怒，事關佢機票買咗、針又打埋先嚟話去唔成，又好難怪佢嬲到爆嘅！佢大鬧倡議「睇肉團」嘅陳恒鑌、張宇人，話前者倡議完又唔報名，後者就因健康問題去唔到，佢又話既然去唔到，一開始就唔好倡議喇！一舊雲又話秘書處用咗好多時間精力去籌辦，最後去唔成係非常差嘅情況，覺得好離譜同好遺憾。
至於譚文豪就話一開始已表明視乎行程先決定去唔去，提出要睇成個肉類供應鏈嘅運作，例如點保持肉類溫度、運送過程情況等，結果成個行程有三日係去睇農場，而只會同當地政府官員會面，唔會同地方區會溝通，佢就覺得既然搞咗咁耐都安排唔到，索性決定退出。
「睇肉團」搞唔成，譚文豪認為責任同退出嘅先後次序無關係，反指倡議去巴西嘅陳恒鑌同張宇人應負多啲責任，仲話就算張宇人有健康問題，佢都可以搵黨友代表參加啫！