中環出更：扭擰答問題 阿基狂畀卿姐窒
早前有傳民協嘅立法會前議員馮檢基（阿基）將會退黨參選，而喺較早前原定舉行傳媒茶敍交代事件，但又突然取消。阿基尋日出席立法會前議員劉慧卿（卿姐）嘅節目時，回應多條問題都扭扭擰擰，被卿姐多次窒佢。
話唔答傳聞中事
卿姐問佢點解突然取消記招，係咪退黨？阿基話有啲事處理中，傳聞嘅嘢唔答，依家仲係民協中常委。劉慧卿反駁「唓，你唔好問我依家仲係咪民主黨」。阿基又提到早前流傳佢加入建制派立法會議員梁美芬嘅陣營，覺得有咁多傳聞，好難逐一回應。卿姐亦唔認同，認為阿基只要答唔係，就會冇乜呢個傳聞。至於會否參與九西補選，阿基就聲稱忙於準備出版新書，依家唔得閒諗呢個問題。
講起上次立法會九龍西補選「屈基」事件時，阿基話當時一間傳媒機構同真普選聯盟召集人鄭宇碩，都攞住若泛民參選人姚松炎被取消參選資格後，有何後備人選嘅名單，阿基當時以為好多傳統民主派已經支持呢件事。卿姐再次唔認同佢嘅睇法，反問佢係咪覺得鄭宇碩可以代表整個民主派，質疑阿基並非唔識其他民主派人士，點解唔直接問佢哋。
但有一件事卿姐係認同阿基，就係阿基提到上次補選後曾去信要求民主動力改善初選機制，至今仍未獲回覆，民主動力只係回覆傳媒話唔會檢討。卿姐認為民主動力應該回覆阿基。
卓妮