中環出更：蔡德昇贈「青聯綠」高球外套 郭永亮當自己世界冠軍
最近換屆改選嘅香港青年聯會，嚟緊會喺七月一日上任嘅新主席蔡德昇就代表主席團為一班前輩準備咗唔少禮物，而且份份都係度身訂造，心思爆棚！例如即將卸任主席嘅郭永亮就收到一件「青聯綠」高爾夫球外套，蔡德昇話郭永亮係高球好手，而佢喺過去一年對該會「發號施令」，就好似佢打高球一樣「百發百中」，所以決定送一件高爾夫球外套畀佢。
呢件綠色外套唔簡單o架！事關呢隻綠色除咗係青聯主色，仲係美國高爾夫球大師賽冠軍嘅外套顏色！郭永亮都大讚件外套有驚喜有心思，不過佢就話唔會着住嚟打波喇，但相信每次見到件外套都會諗起過去一年嘅成果，仲會當自己就係今屆世界冠軍咁話。
將會榮升榮譽副主席嘅陳曉峰一直都係青聯嘅軍師，亦為青聯舉辦活動提供法律意見，但佢收到嘅禮物竟然係一條圍裙，唔知同法律有乜嘢關係？原來佢仲係青聯嘅大廚，煮嘢食相當了得，所以蔡德昇咪送條圍裙畀佢煮嘢食時用囉！
蔡德昇準備咁充足，唔通佢早知自己一定可以順利升任主席，冇人反對？佢笑笑口解釋話大部分人都支持佢，但喺改選嘅時候都有人反對，嗰個就係佢太太李美辰喇！之不過，其實係其他人捉住佢太太隻手嚟舉手反對，仲大大聲講話：「你一定要大力反對啦，如果唔係你嚟緊呢一年都見唔到個老公喇！」
李美辰：終於可以放吓假
原來青聯之前統計過，主席一年要出席逾四百個活動，平均每日多過一個，聽到已知忙到爆，加埋正職真係冇幾多時間照顧家庭，但李美辰都講笑話：「終於可以放吓假，同三個仔女可以唔使成日見到你喇！」睇嚟李美辰都預咗蔡德昇將會「長期失蹤」，準備好撐住屋企嚟幫輕老公嘞！
卓妮