政情：膽粗粗北上工作 張永康轉危為機
近年愈嚟愈興暑期實習，鼓勵年輕人去吓其他地方打工，體驗吓其他地方嘅文化同習慣。香港金融青年會主席張永康就話佢早就喺二十年前，即一九九八年就開始返內地工作，佢仲話一開始完全唔識講普通話，而且只係返過內地一次，但當時就有一個返內地工作嘅機會，諗咗好耐就膽粗粗放手一搏，結果獲益良多。
唔識普通話冇有怕
張永康話當時唔怕唔識普通話、唔怕唔熟悉內地文化、唔怕喺內地冇親朋戚友，單純覺得內地嘅市場有利可圖，結果一做就做咗好多年！
喺內地做嘢做咗咁多年，有乜得着？佢話二十年前返內地係香港人將一啲標準、做法帶入去，今時今日已經變成將內地嘅嘢帶番出嚟，認為呢個既係危又係機，例如佢自己就變成一個既熟悉香港，又了解內地嘅人，成為自己喺金融界嘅優勢，仲鼓勵年輕人多啲把握危機，就可以轉成自己嘅機會喇！