職場健康：飲食三低一高 減患慢性病風險
上星期提到，新丁小甘得到師傅博士指導，明白大熱天時最佳解暑飲品往往是清涼的水，小甘亦變得注意健康飲食。最近，參加了公司龍舟隊的小甘每星期都要去沙田練習，而今日小甘一家也有到場打氣。
「大熱天時卅幾度出咁多汗，要補充吓鹽分，沖完涼拿拿聲去隔籬酒樓叫你最鍾意食嘅豆豉鯪魚炒飯啦！」爺爺說。
小甘說︰「阿爺你講得無錯，我睇到職安局刊物話，戶外工作同埋運動出汗會導致電解質流失，不過，我戒咗重口味啦……」
「唔啱食呀？咁食咩好呀？」爺爺問。
宜以蒸焗方式烹調
小甘答︰「炒飯同罐頭魚固然好食，但以成年人每日約需要二千千卡計，唔應該攝取多於六十克脂肪同二千毫克鈉，當中已包括油、肉及奶類等食物內嘅脂肪，但係一碟炒飯已含約五十克脂肪，即十茶匙嘅油，幾乎係成人一日所需，仲未計今朝嘅牛奶麥皮同晚飯！」
小甘又話：「市面上唔少加工食物嘅鹽分都好高！以豆豉鯪魚為例，一百克就有二千三百一十毫克鈉，超晒標啦！上次我參加職安局同衞生署合辦嘅好心情@健康工作間活動，學到食得健康最緊要係均衡飲食同三低一高，即係低油、低鹽、低糖同高纖，五穀類食最多，其次係五份蔬菜，最少肉類，可以減低患上慢性疾病風險。烹調方法方面，白飯配蒸、焗及少油快炒嘅小菜，蔬菜就配肉類菜式，好似西蘭花炒帶子就較健康。」
爺爺同意稱：「既然係咁，等阿爺重出江湖，今晚煮滑蛋蝦仁同蒸魚啦！」
職業安全健康局
www.oshc.org.hk