政情：列立會黑名單 游蕙禎前議助實習被逐
青年新政嘅立法會前議員游蕙禎及梁頌恆，一六年衝擊立法會會議室，兩人早前被裁定參與非法集結罪罪成及判囚四星期，而游蕙禎即時入獄。然而游蕙禎前議助李宗澤去咗公民黨郭家麒議辦做實習，尋日返工冇耐就被要求離開立法會，皆因佢係立法會黑名單人士。
「想做普通人」希望快啲解禁
李宗澤尋日傍晚喺社交網站發貼，話按課程需要今年要到政黨實習，即尋日朝早十一點好順利進入立法會到郭家麒辦事處返工，點知下晝就被通知係黑名單人士要即時離開。經交涉後，佢喺完成工作後先走，但就講番當日游梁衝會議室，自己只係執行職務，事後有份坐同一部𨋢就入咗黑名單。佢又話事隔一年半，期間無入過立法會，而「老細（游蕙禎）都坐埋監」，點知仲有黑名單，「想讀個書做個普通人都要搞我」，希望行管會快啲解禁令。
郭家麒回覆查詢時話事前冇篩選，強調只要係大學生想學嘢都會請。佢尋日下晝喺立法會開緊會時，秘書處通知佢李宗澤係黑名單內人士要離開，佢立即要求核實身份，而最後秘書處畀咗張一六年十一月八日嘅新聞稿佢睇，行管會禁止十三名議助進入立法會，而李宗澤係其中一人。佢對事件感到詫異，話禁入法庭都要落禁令，行管會無機制檢討，咪有人一世都禁足立法會？佢將去信行管會要求跟進及交代，期間李宗澤會到其地區議辦工作，唔會影響實習。
立法會秘書處回覆查詢時話行管會喺一六年十一月八日決定，唔容許十三人進入立法會綜合大樓，直至另行通告。