政情：李慧琼追多個有難度
民建聯李慧琼（Starry）既係立法會議員，又係九龍城區議員，依家仲做埋黨副主席，都睇怕好難有私人時間剩。Starry尋日接受電台訪問時坦言，陪囡囡嘅時間少咗好多，但好在囡囡仲肯陪佢瞓，而且每晚都要聽佢講故事，所以兩母女關係都唔係太疏離，但如果要追多個，佢就直言無能為力喎！
Starry坦言，現時已好難搵到時間照顧小朋友，如果有得返轉頭嘅話，佢希望可以生對twins，咁就可以一胎兩個搞掂晒。嚟緊Starry好大機會循超級區議會出選，相信佢為備戰選舉將會忙上加忙，難怪佢話生多個都無能為力喇。
身為會計師嘅Starry，嫌自己打扮太正經，所以近期試過將頭髮染成紫色添。但有次立法會開會，喺鏡頭下紫色頭髮變得好顯眼，搞到佢即刻染返黑色，但佢話會再染色，實行要做個有型議員喎！