政情：收料站：自決派失光環 撐唔起李鳳琼
東區區議會佳曉選區補選結果尋日凌晨揭盅，由孭住民建聯及工聯會「雙牌頭」嘅植潔鈴以二千二百多票當選，大比數拋離民主派社福界選委李鳳琼。前日投票日，植、李兩人嘅助選團都「星光熠熠」，其中李鳳琼更獲得多名自決派人士現身撐場，包括劉小麗、香港眾志羅冠聰及周庭等，希望可以取得民主派立法會議員區諾軒嘅「基本盤」。可惜結果都要輸，足證自決派已失光環，民主派嘅如意算盤經已打不響。
點票前話「輸少當贏」
有泛民中人透露，突如其來嘅補選，民主派最初未有人選出戰，勸得李鳳琼「獻身」都只係試圖破釜沉舟，根本就知「無得贏」。而今次補選嘅總投票率達百分之四十九，較換屆選舉為高，理應有利民主派，但亦無濟於事。有分析指，李鳳琼本身嘅「政治魅力」不足，而且佢又不善於應對外界，說話「論盡」，難免有些許力有不逮。難怪喺點票前，民主派已鬆口聲稱「打定輸數」、「輸少當贏」，又話取得近千票已係「雖敗猶榮」。
不過，民主派仍極力支持李鳳琼，區諾軒尋日就發貼分析結果，稱佳曉區長期無民主派參選，李鳳琼所得嘅一千三百多票係勤力落區耕耘而來，再加上植潔鈴係第二次參選，用咗十幾年先攻陷佳曉嘅堡壘，強調今次有針對性部署，配合科學化分析，仍可一戰喎。