政情：今日你上鏡：自爆有白內障 袁國勇：好小事

今年六十一歲嘅港大微生物學系講座教授袁國勇，平時醉心研究病毒細菌，日日喺實驗室埋頭苦幹。成日接觸病毒嘅佢，未有受到病毒攻擊，反而因為經常要瞇埋眼睇顯微鏡，搞到有白內障添！尋日佢提到自己有眼疾時，最初唔肯透露係咩事，只係笑笑口話近期對眼有問題，做咗兩次小手術，後來被「窮追猛打」下先講係白內障，仲笑住話「好小事啫！」袁國勇又話，如果港大唔同佢續約，如無意外會喺六十五歲退休。咁講，即係如果大學繼續聘請佢，佢都冇諗過要退下火線喎！