政情：醫管局請CEO 講心唔講金？

醫院管理局行政總裁梁栢賢（PY）明年十一月約滿退休，醫管局近日正式公開招聘行政總裁，招聘通知列明繼任人要領導七萬七千名醫管局員工，亦要負責妥善管理約六百八十億港元嘅經常性撥款，講到好似好唔易做咁，但通告中就冇提到薪酬。唔通係講心唔講金？

呢個招聘通告喺醫管局網頁刊出，關於工作嘅要求都唔少，既要負責監察及評估公營醫療系統嘅有效性，亦要對外、內都係「溝通能手」，最好識埋中文同英文。咦？咁好似前行政總裁蘇利民，咪過唔到關呢？

雖然通告中無列出薪酬，但聽聞醫管局會根據候選人嘅經驗同履歷，同個別候選人洽談薪酬。根據上年度醫管局年報，PY年薪有近六百萬港元。

據悉至少有四名為人熟悉又資深嘅現任、前任聯網行政總監，有機會競逐成為「接班人」。有關招聘至下月六日截止，預計今年底將產生最後入選名單畀遴選委員會。