政情：廖振新開會搶答兼Hea答 葉劉勞氣訓示

專業職系主管冇專業資格 嚇親葉劉

立法會人事編制小組委員會尋日討論喺土木工程拓展署及路政署分別開設一個總園境師嘅職位，立法會議員張超雄問起，相關職位對整個規劃同設計會有咩改善。廖振新話，搞新發展區需要規劃大綱以外，亦都要有總體園境規劃，例如新發展區中必須有休憩用地。張超雄追問呢啲職位點樣影響工程設計，廖振新喺葉劉指示佢回答前，就好爽快咁話呢個問題交由其他同事回答。呢個時候葉劉忍唔住出聲：「我請官員向主席發言，唔好同議員直接對話。」

唔單止議會規矩令葉劉忍唔住出聲，廖振新耍太極咁回答問題，葉劉都唔多收貨。葉劉問起依家有好多砍樹同護樹爭議，當局會唔會考慮請個真正高層次嘅樹藝專家，廖振新僅稱認真考慮。葉劉即刻反問：「會考慮？考慮幾耐？！」跟住又建議當局可以先請個顧問，廖振新唔知係咪被葉劉咄咄逼人嘅氣勢嚇親，遲疑咗一陣就口震震咁答「積極考慮，盡快、盡快，如果有個諗法就報告番」喎。呢次真係點醒啲官，唔好以為下下答「考慮」就過到關，冇時間表嘅考慮都係敷衍啦！

此外，當局稱園境師職系嘅head of grade、即主管係發展局常任秘書長，不過現時常秘並非專業園境師，葉劉即露出訝異嘅表情。廖振新急急解釋話，常秘係領導嘅職務，當管理相關職系時，局方係倚重發展局綠化及園境辦事處總監黃秋雲咁話。

葉劉指好少聽過專業職系嘅主管冇專業資格，又質疑如果黃秋雲同新職位同級，又如何管理人哋呢？會否遲啲又升埋黃秋雲嘅職位呢？政府隨即解釋，黃秋雲不會管其他總園境師，而係管理高級園境師等等，亦會與其他總園境師緊密合作云云。答到亂晒陣腳，真係冇眼睇。