政情：立會清潔工薪金低 鄭松泰戥唔抵
立法會議員人工高，令人會有錯覺以為連帶其他喺立法會工作嘅人員，甚至清潔工人嘅薪金都會比坊間稍高。不過，議員鄭松泰就話唔係，好似清潔工人最近先獲得加薪，未加之前時薪只係比最低工資高出五毫子，所以有唔少人頂唔住而離職。
話會多關注外判制度
鄭松泰近年好關注立法會嘅外判問題，事關幾年前佢收到立會外判工人求助，不過所掌握嘅合約細節唔多。直至今年喺財政預算案中發現，立會清潔工人人工竟然咁低，所以佢都有開聲批評。上星期佢獲悉清潔工人可獲加五百元月薪，都戥佢哋開心，都有清潔工人搵人傳話同佢講聲多謝咁喇。
鄭松泰仲話，議會內有唔少基層同勞工嘅職位，唔希望立法會成為帶頭剝削嘅地方，所以日後要繼續關注外判制度喎。