中環出更：加議辦開支有着數 廖長江和稀泥
建制與泛民平時開會火花四濺，不過利字當頭時，都可以「行埋一齊」。立法會議員酬金及工作開支償還款額小組委員會尋日開會，討論增加辦事處營運開支建議，建制及泛民難得咁啱傾，一小時內已達成共識，九成人一致認同使用加權調整指數計算開支調整幅度。連建制派「重炮手」兼班長廖長江都變得「和稀泥」，只係輕輕帶過泛民拉布問題，工程界盧偉國更盛讚委員會主席黃定光英明領導，令各黨派迅速取得共識喎！
提及拉布冇晒火
委員會早前就以加權指數取代丙類消費物價指數，作為每年調整辦事處營運開支償還款額水平嘅基準建議，並向全體議員諮詢，秘書處共接獲九成四議員回覆同意。尋日唔少議員關注議助薪酬開支，工聯會何啟明話，舊年按通脹加薪只有約百分之一，希望日後可以中低級公務員薪級作參考。
會議氣氛難得咁和諧，聽嚟聽去只有廖長江提及過「拉布」，話自己經歷過拉布同反拉布，當時加會加到超晒時，所以戥議助辛苦，希望可以為佢哋爭取合理待遇。講到尾，都係想爭取利益啫。
卓妮