中環出更：楊志雄試過鐵釘拮屁股 最怕細路染菌
近年Playroom、Partyroom非常流行，當中亦不乏專門畀小朋友玩嘅室內幼兒中心，但近日就有個小妹妹喺Playroom嘅波波池入面畀鐵釘拮穿咗個頭，真係好危險。日前喺沙田馬場見到香港電子業商會榮譽會長楊志雄，殊不知佢都試過，話當年讀書時練過跳高，話練跳高經常要調整橫杆嘅高度，而調整高度需要用到鐵釘，結果有一次佢貪方便將啲鐵釘放咗褲袋，跳之前又唔記得拎番出嚟，結果一跳就拮咗入屁股。聽到都覺得痛啊！
楊志雄認為無論係自己定係小妹妹，受傷都係屬於意外，所以都冇擔心出街玩唔安全嘅問題，如果佢幾個孫話要去Playroom玩，佢都一樣會帶佢哋去。不過，佢都唔係天不怕地不怕嘅，雖然唔怕受傷，但就好怕細菌，唔會帶啲孫仔去人多嘅地方，避免感染病菌咁話。
王庭聰唔畀愛女玩過山車
在場嘅香港工商總會主席王庭聰直言聽到單新聞都「打冷震」，好彩佢一向都好小心，通常帶啲孫去玩都會去自己屋企嘅會所，有保障多啲，而其實佢以前都唔畀個女玩過山車呢啲高危嘅機動遊戲，連打鞦韆都少，主要係玩塑膠滑梯。佢認為政府應該嚴格監管呢啲Playroom，否則再有小朋友受傷就大件事喇！
香港廠商聯合會名譽會長顏吳餘英都覺得呢啲Playroom缺乏監管好危險，好容易發生意外，所以有時見啲孫玩跳彈床都提心吊膽，一定要有導師喺旁邊先准玩，佢仲話以前細個啲活動冇咁激烈，最多都係試過同堂弟爭鞦韆玩，畀佢一手拉咗落嚟，好彩都冇受重傷，而依家啲康樂設施好多設喺工廈，都唔知合唔合規格，話政府真係要加強監管先得。
卓妮