中環出更：OK論失言 馬時亨賴天熱冇祈禱
廣深港高速鐵路試行期間接二連三被揭發多宗事故，港鐵主席馬時亨都無得停要不斷解釋。不過，日前佢竟然拒絕透露更多資料，仲豪言「我哋話畀你聽OK就得」，言論令人嘩然。直到尋日佢先就失言解畫，但竟然話可能同當日天口㷫、冇祈禱有關喎，呢個理由認真牽強囉！
講明毋須修正言論
馬時亨尋日接受電台訪問，講到日前嘅「OK論」，佢竟然笑住話當日「唔知係咪天口㷫、朝早無祈禱」去作解釋，仲講明毋須修正呢番言論，因為提供更多資料無助事情喎。
另外，佢又以茶餐廳開張前漏水，去比喻高鐵近日爆出嘅連番事故，舉例話餐廳地板喺試運期間出現漏水問題，都無理由要向未來顧客公布。不過，高鐵嘅建設費用涉及公帑，市民當然唔止得顧客一個身份，唔通餐廳開張前有問題就毋須通知好似股東呢啲其他持份者咩！
卓妮