政情：青年新政熱血公民跌出十大政團 港獨自決「冇市場」
青年新政嘅游蕙禎同梁頌恆，因為喺立法會宣誓爆粗辱華風波被取消立法會議員資格（DQ）後，已經沉寂咗一段長時間，兩人亦甚少公開露面，只係間中喺大型遊行隊伍中現身，而香港大學民意研究計劃公布最新「十大政治團體」認知度及評分排名，青年新政亦被DQ，同熱血公民雙雙跌出十大。換言之，港獨、自決派已沒落。
今次調查分兩輪進行，首輪為本月初嘅認知率排名調查，第二輪係本月十六日至十九日嘅支持度評分調查。結果顯示，大部分認知率高嘅政團，評分都喺五十分以下，而上次調查排喺第九位同第十位嘅青年新政同熱血公民，今次雙雙跌出十大。至於激進派方面，社民連及人民力量雖仍在十大政團之內，但排名已由半年前的第七及第八位，跌至今次排第九同第十位。
工黨民協重新入榜
喺呢次調查期間所發生嘅事件，先有因香港眾志「民主自決」嘅立場，其常委周庭被DQ參選立法會港島區補選嘅資格，繼而係立法會四席補選議席由泛民同建制平分，再加上港大法律系副教授戴耀廷喺台灣播獨風波等，港獨問題鬧得滿城風雨，然而有關民調結果卻顯示，港獨、自決同激進派嘅支持度大幅下降，反映市民對佢哋嘅不滿，佢哋亦已經冇市場嘞！
港獨、自決派沒落，反令傳統泛民得益。喺上次調查，工黨被列為認知度最低政團，而民協則未能躋身市民所熟悉嘅政團名單內，然而今次兩黨分別以四十四點九分及四十四點六分，返回十大政團榜，更擠身第二及第三位，兩黨嘅評分更高過泛民最大黨——民主黨。
喺建制派方面，工聯會同新民黨均錄得顯著下跌，前者由第二位跌至第七位，後者則由第四跌至第六位，而自由黨則排第五位，民建聯則排第八位。雖然民協重返十大，而其錄得嘅評分同錄得四十一點一分嘅工聯會，兩黨嘅支持度評分均為自一九九一年相關調查展開以來嘅新低。