中環出更：創科冇晒私隱 卿姐唔想「剝光豬」
被人「剝光豬」睇全相當然個個都唔想，但因乜事前立法會議員劉慧卿（卿姐）尋日咁高調話唔想呢？原來係因近年成日都講創科，FinTech（金融科技）、電子支付等都話要收集大數據，分析每個市民嘅日常生活習慣同行蹤，結果啲個人資料就被人掌握得一清二楚，咁卿姐咪覺得冇晒私隱，好似「剝晒衫畀人查」咁囉！
黃繼兒盼幫市民「着番啲衫」
個人資料私隱專員黃繼兒尋日接受卿姐訪問時，直認上述情況「真係好似剝光豬」咁，咁市民係咪唔會再有私隱？黃繼兒就話，顧及社會經濟發展、發展智慧城市、市民生活便利程度等方面，的確需要分析大數據，但佢作為私隱專員，都希望可以幫市民「適當地着番啲衫」。
黃繼兒又話，要推動營運商、發展商做良心企業，唔好每次洩漏咗資料，先至後知後覺咁亡羊補牢，一早做好啲預防措施就最好，而佢哋亦會研究修例，加大個人資料私隱專員公署嘅權力，同時加重罰則，以加強阻嚇力。如果政府啲庸官都識得凡事先知先覺，就唔使等出事後先至補鑊喇！
卓妮