政情：鄭若驊應告唔告攞嚟衰
上任三個多月嘅律政司司長鄭若驊爭議纏身，包括「放生」捲入秘密捐款醜聞嘅壹傳媒黎智英（漢奸黎）及泛民多名現任及前任議員，但泛民無因而感到皇恩浩蕩或「執到」，放過狙擊鄭若驊嘅機會，因應律政司於一八至一九年度預算開支為二十二點九億元，較上年度大增四成，有泛民議員趁鄭若驊到立法會，質疑依家刑事檢控滲入政治成分，憂慮增加撥款只會用作政治檢控用途，鄭若驊回應時死撐作出檢控決定時會按檢控守則進行，亦會考慮公眾利益，不受任何干涉。放生咗泛民，竟然又畀泛民反咬，鄭若驊根本係自己攞嚟衰喇！
至於平時同泛民立場迥異嘅建制陣營，其實亦對鄭若驊有意見，除咗對主張港獨分子視而不見，無零容忍嚴厲執法，有建制派議員關注，有份取消參選補選資格嘅選舉主任，其責任過大，享有嘅酌情權亦太寬，形容有關做法唔恰當，認為喺政策及法例上應有更清晰條文及指引。鄭若驊回應時疑卸責，僅稱律政司司長負責提出法律意見，有關問題屬於政制及內地事務局工作範疇，而現行制度係由選舉主任作出決定。
鄭若驊遭到泛民、建制齊聲質疑，兩面不是人，有分析指其實係鄭若驊自己「攞嚟衰」，因為事實擺在眼前，鄭若驊上任後多個重要決定均遭到外界非議，最引起外界嘩然係屢次「放生」漢奸黎，以及多名泛民人士。
刑恐本報記者遲遲未檢控
第一，鄭若驊上任不足一個月，就放生捲入秘密捐款醜聞嘅漢奸黎；第二，漢奸黎喺舊年六月涉刑恐東方報業集團男記者，以「×你老母×」、「我實會搵人搞×你」、「我影×咗你嘅相」等涉出言恐嚇，當日「有相有片」，證據確鑿，之不過事隔逾十個月，至今仍然無下文，律政司至今仍未檢控漢奸黎。
除此之外，持續七十九日違法佔中距今逾三年多時間，四十八名違法佔中搞手，只有九人被起訴，包括漢奸黎在內三十九人仍然逍遙法外，鄭若驊於多宗案件「應告唔告」，加上被指「放生」涉事嘅泛民中人，最終換來泛民人士公開批評質疑，真係自己「攞嚟衰」，與人無尤。
至於泛民議員於尋日立法會上，質疑鄭若驊時看似有根有據，有指其實係「威人威威不是威」，佢哋暫時仲可以自我感覺良好，他朝一日被執法部門盯上「落鑊」收場，就知道出得嚟行遲早要還，一切冥冥之中自有注定。