中環出更：搵老友捐善款陳細潔忙唔停
保良局尋日換屆，卸任保良局主席嘅陳細潔（Abbie）就話好唔捨得，話晒佢由總理開始，已服務咗保良局十一年，所以不捨之情多少都有啲o架喇！不過佢覺得做咗咁耐都好足夠，特別係佢做主席嘅呢一年，平均每日都只係瞓得四至五個鐘，公司嘅業務更加係完全冇打理，全職投入做主席，真係忙到冇停手，期間好多假期都取消咗，所以嚟緊七月會去英國放大假，好好休息吓咁話。
問到任內遇到過啲乜嘢困難，Abbie就話籌錢係一個難題，事關好多人以為保良局已經有多年歷史，實係有好多錢，但實情保良局嘅開支都好大，每年大概要使三十億港元，而就算扣除政府資助，每年都要籌錢十億元，所以佢上任以嚟成日都要搵啲老友捐錢，仲要親自做計劃書、親自上門去解釋，咁先可以說服到人捐錢，唔怪得Abbie呢一年忙到連假都冇得放啦！
副主席馬清楠都話保良局財雄勢大係一場誤會，因為保良局服務範疇多，服務人數成七十萬人，所以好多時都冇咩錢剩，甚至有啲老人院係入不敷支添，但佢話保良局係本住服務市民嘅心，所以好多嘢都唔係用錢衡量嘅，惟有盡量自己多啲搵朋友幫手，除咗捐錢，仲睇吓有冇一啲專業人士可以提供一啲義務或者低價錢嘅服務幫輕吓。
廖偉芬湯振傑齊做總理
另外，今年廖偉芬、湯振傑兩表姊弟亦都齊齊加入保良局做總理，而兩人加入嘅原因竟然都係同家族有關！廖偉芬話爸爸廖烈正以前都加入過保良局，殊不知佢加入咗之後，先發現爺爺嫲嫲都做過保良局總理！至於湯振傑，除咗佢姑丈，即廖烈正係保良局成員外，佢嘅妹妹、表哥都分別去咗唔同嘅慈善團體，搞到佢都想入善團服務吓社會，所以咪跟埋表姐齊齊加入保良局囉！
卓妮