政情：選舉處老點 票站鬧雙胞
立法會補選四個議席聽日就要舉行投票，近日選舉事務處向相關選民寄出投票通知卡、候選人簡介以及投票站地圖等等。不過有讀者投訴話，收到嘅投票通知卡上所列嘅投票站地址，與附帶地圖上所列嘅地點不符，唔知邊一個先至係真票站喎。
認衰指大意 稱可網上查閱
據讀者嘅投訴，投票通知卡上嘅地址為大埔太和邨太和鄰里社區中心，但係附帶嘅地圖變咗係大埔太和邨林村公立黃福鑾紀念學校。選舉事務處接受本報查詢時認衰，話相信係有關人員一時大意，將不相符嘅文件寄往同一選民，並就事件已提示有關人員須多加留意，避免同類事件發生。
選舉事務處又指，選民可登入選民資料網上查閱系統，查閱自己獲編配嘅投票站。即使選民收取嘅投票通知卡與地圖不符，都唔會影響投票資格。如有市民遇到同類情況，可向該處查詢。