政情：無檔期審議《國歌法》讓路
日前有消息指出，喺本月二十三日召開嘅立法會政制事務委員會會議，可能會討論《國歌法》本地立法嘅事宜，甚或喺七月立法會休會前就草案進行首讀。《國歌法》本地立法時間表咁「寬鬆」，唔通政制及內地事務局局長聶德權對呢次立法唔上心？據悉，其中一個原因，係立法會休會前已經冇檔期可以分出嚟。
《國歌法》本地立法爭議唔少，預計日後成立條例草案委員會，建制派同民主派陣營都會「冧友」加入，而咁多人開會就只有會議室一或會議室二呢兩間房有足夠座位，開會時間亦要同其他委員會夾夾以免撞期。但係，不論會議室抑或議員嘅檔期，其實已被《廣深港高鐵（一地兩檢）條例草案》委員會同財務委員會搶晒嘞！
一地兩檢草案 財會踩行油
一地兩檢法案委員會有六十名議員加入，港府已講明如果立法會喺七月休會前未能完成一地兩檢本地立法，將會影響預計今年第三季通車嘅廣深港高鐵，所以委員會主席葉劉淑儀立刻踩油，喺本月十三日至下月三十日期間召開十三次會議；同樣趕時間嘅仲有財委會，主席陳健波亦喺下月加開四日合共十六小時會議，追趕因「拉布」而落後嘅審批撥款進度。
呢兩個委員會都佔咗絕大部分議員，同樣需要大房開會，考慮到兩個委員會喺五月同六月，甚至七月休會前都會盡搶檔期。換言之，當局就算為《國歌法》成立條例草案委員會，隨時只有空殼，冇檔期舉行會議，若果硬插審議《國歌法》本地立法草案，亦可能因此節外生枝，令泛民有機可乘阻延一地兩檢條例草案嘅審議工作。
尚有本地立法條文待釐清
至於另一原因，自不然係《國歌法》嘅本地立法條文仲有好多地方要釐清，例如故意貶損國歌，當中貶損的定義；又例如將國歌納入中小學教育，技術上如何落實等等，所以從現實嘅政治環境嚟講，一地兩檢條例草案通過事大，冇時限嘅《國歌法》當然要讓路喇！