政情：楊潤雄爆首次考AO 面試機會都冇
應屆大專畢業生好快就會開始積極搵工，教育局局長楊潤雄尋日出席職業博覽與大專生對談時，被學生問到投考公務員貼士同搵工心得。楊潤雄自爆，當年畢業後投考政府，但「（面試）見都冇得見」，要在會計界打滾七年，投考政務官（AO）才加入政府，勸勉學生各行各業都有發揮機會，技能得到提升後，將來獲得心儀工作嘅機會亦會提升。
籲學生求職要實際
有學生就話，好多年輕人為咗揀選心儀工作，令到待業時間變長，問楊潤雄喺求職時應以邊種心態去應對。楊潤雄坦言，「你揀工，工都揀你」，學生投身職場，看法要實際一啲，搵一份有前途同學到嘢嘅工作。佢就以自己為例，畢業後未能加入政府，但工作七年後，較以前成熟，投考AO嘅機會提高咗，「如果我第一年考唔到（AO）就乜都唔做，可能考七年都考唔到。」
有學生又問到，會計界係咪如傳聞中「有返工冇收工」時，楊潤雄笑笑口話打政府工、做記者等都一樣「冇放工冇假期」。佢憶述，剛投身會計行業時工作好辛苦，「（工作）做到幾多點，都仲有得做」，但亦令佢學識如何掌控時間。