中環出更：卿姐赤口無忌 與葉劉舌戰普選
前日大年初三「赤口」，相傳呢日易招惹口舌是非，大家都唔會去拜年。不過前立法會議員劉慧卿（卿姐）就百無禁忌，與新民黨立法會議員葉劉淑儀（葉劉）同枱食飯，席間仲就普選唇槍舌劍！葉劉強調大家政見雖有不同，都係好欣賞卿姐嘅執着喎。
校友聚會約食飯
卿姐前晚喺Facebook上載相片，同一大班人食晚飯，座上客就包括葉劉同佢囡囡。問番係咪咁啱撞到，葉劉笑稱係約埋嘅，大家都係「倫敦經濟學會」嘅校友，時不時會約埋一齊食飯聚會，只係新年前約唔到，咪改喺初三食飯囉！佢話今次係卿姐師妹負責做搞手，好開心見到卿姐好精神，席上有幾位朋友係年輕律師，大家不時傾吓偈、交流吓意見咁啫！
葉劉仲話卿姐離開立法會年半，同佢見面嘅機會少咗，而卿姐依家嘅生活比以前清閒得多，但係堅持己見嘅態度仍然無變，例如仲希望有普選，但葉劉就話普選要喺「八三一框架」下進行，先有望獲得通過。
唔單止講普選，葉劉仲話卿姐裸退幫黨友林卓廷當選做立法會議員，又無借自己嘅政治本錢向政府換取賞賜，呢份堅持原則嘅信念實在好難得，令佢好敬佩卿姐咁話。
卓妮