中環出更：莊偉茵推介網上求籤「包冇搞錯」

Quince話細個都有跟媽媽去求籤，相當緊張籤文，上中下籤都求到過晒，但求完通常唔係好記得，就算求到下籤，嗰年就可能謹慎啲，如果係求到上籤就提醒自己唔好有風使盡。

佢話其實都係陪吓老人家去做啫，依家就冇嘞，自己成日研究，點解啲人要咁辛苦去現場求籤，其實世界已經數碼化，求籤上香都可以網上搞掂。

難得放假，莊偉茵（中）同老公（右）及兒子（左）一齊去馬場玩吓。（徐家浩攝）

張雲正（左）同太太新婚，今年係第一年「找數」派利是。

張雲正夫婦派利是「找數」

離開官場後好少喺公眾場合露面嘅公務員事務局前局長張雲正（Clement）同太太Florence，當日陪外地返港嘅親戚一齊入馬場。

問佢哋第一年派利是係咪好興奮，Florence笑指「收利是嗰個興奮啲」，Clement話好多人等佢派利是好多年，非常熱切期待佢「找數」。

講起近況，Clement話幫媽媽搵到個好工人，依家磨合咗兩個月。佢仲諗咗好多招數令到媽媽同工人相處得更好，包括由自己畀晒工人嘅所有支出，令媽媽唔使帶現金喺身，又喺銀行輪到個保險箱畀媽媽放置貴重物品，咁媽媽就唔使擔心唔記得啲嘢放喺邊，避免誤解。

譚健業年年求籤及借庫

佢又話之前怕媽媽會跌倒，日日都要去媽媽屋企陪住佢，依家媽媽同工人感情愈來愈好，自己壓力都細啲。

九龍樂善堂當年委員譚健業就話，近幾年逢初七就會去求籤，未試過求到上籤同下籤，淨係求到中吉同中平，而且佢仲年年都會去觀音借庫，最多借過三億八千萬元，最少就借三千至五千萬元，不過正月前都一定會還庫還足喎。

卓妮